O dro i dro, mae Cynghorau Sir Ddinbych, Sir y Fflint a Wrecsam yn galw ar aelodau i fod ar baneli annibynnol sy’n gwneud penderfyniadau am apeliadau derbyn a gwahardd disgyblion ysgol.

Os ydych chi’n gymwys, gallwch ymgeisio i fod yn aelod o banel.

Sut mae’r paneli’n gweithio?

Mae paneli fel rheol yn gwrando ar apeliadau wyneb yn wyneb.

Mae'r materion sy'n cael eu hystyried gan y ddau banel yn eithaf gwahanol, ond mae’r ffordd mae’r panel yn cael ei weinyddu’n debyg ar gyfer y ddau fath o apêl.

Mae’r panel yn cael cymorth gan glerc sy’n gofalu bod y ffeithiau perthnasol yn cael eu darparu a bod gwrandawiadau apêl yn cael eu cynnal yn deg ac yn briodol. Mae’r clerc yn ffynhonnell annibynnol o gyngor ar y weithdrefn a thystiolaeth. Mae’n cofnodi’r trafodion, y penderfyniadau a’r rhesymau, cyn rhoi gwybod i bob ochr am benderfyniad y panel. Gall y panel wahodd y clerc i aros tra maen nhw’n ystyried apêl, ond nid yw’r clerc yn cymryd rhan yn y broses benderfynu.

Mae’r panel yn pwyso a mesur yr holl dystiolaeth a gyflwynwyd iddynt yn ofalus ac yn wrthrychol cyn dod i benderfyniad terfynol am yr apêl.

Nid oes unrhyw hawl bellach i apelio yn y materion hyn.

Ynglŷn â rôl aelod o banel

Dyma’r sgiliau rydym ni’n chwilio amdanynt:

  • y gallu i wrando yn ddiduedd a gwerthuso dadleuon a thystiolaeth a gyflwynwyd gan y ddwy ochr
  • pendantrwydd – gan fod rhaid gwneud penderfyniad am yr apêl yn fuan ar ôl gwrando arni
  • hyblygrwydd – bydd angen i chi fod yn hyblyg gyda’ch amser, gan fod apeliadau ar y cyfan yn cael eu clywed yn ystod oriau gwaith (gofynnir i chi a ydych chi ar gael cyn trefnu gwrandawiad apêl bob amser)

Nid yw bob ar banel yn swydd â thâl, ond bydd costau teithio i ac o leoliad yr apêl yn cael eu talu.

Mae’r rhestr o aelodau’n cael ei chadw gan awdurdodau Sir Ddinbych, Sir y Fflint a Wrecsam. Efallai y bydd gofyn i chi fod ar unrhyw un o’r paneli, gan ddibynnu pa bryd rydych chi ar gael a’ch dewisiadau ar eich ffurflen gais.

Cyn y gofynnir i chi eistedd ar unrhyw banel apêl, byddwch yn derbyn hyfforddiant priodol.

Panel apêl derbyniadau – gwybodaeth a chymhwysedd

Gall unrhyw riant neu warcheidwad cyfreithiol apelio yn erbyn penderfyniad gan awdurdod derbyn ysgol i wrthod cynnig lle i'w plentyn yn yr ysgol o'u dewis. Mae gan Rieni hawl i apelio i banel apêl annibynnol fel y disgrifir yn y Ddeddf Fframwaith a Safonau Ysgolion 1998.  

Mae'r paneli hyn yn gwbl annibynnol ar yr awdurdod derbyn (awdurdod lleol a/neu gorff llywodraethu'r ysgol) a wnaeth y penderfyniad y mae’r apêl yn cael ei wneud yn ei erbyn.

Mae’r hawl i apelio yn berthnasol i bob cam o dderbyniadau addysg gorfodol. Nid yw addysg feithrin yn orfodol ac nid oes hawl i apelio yn erbyn penderfyniad i wrthod derbyn ar lefel meithrin.

Tasg y panel yw clywed a phenderfynu ar apeliadau rhieni yn erbyn gwrthod derbyn eu plentyn i’w hysgol ddewisol.

Mae pobl o bob cefndir yn cael eu gwahodd i ymgeisio – mae paneli’n cynnwys aelodau lleyg yn ogystal â rhai sydd â phrofiad ym maes addysg. Mae aelod lleyg yn unigolyn sydd heb brofiad personol o reoli ysgol neu ddarparu addysg (heb gynnwys profiad fel llywodraethwr ysgol neu mewn modd gwirfoddol arall).

Ydych chi’n cael bod ar y panel apêl derbyniadau?

Efallai y bydd amgylchiadau pan nad ydych yn gymwys i fod ar banel apêl derbyniadau.

Ni fyddwch yn gallu bod ar...

  • unrhyw banel apêl derbyniadau os ydych yn aelod o'r awdurdod lleol (er enghraifft cynghorydd) neu os ydych wedi cael unrhyw gysylltiad â'r awdurdod lleol
  • unrhyw banel apêl os ydych yn cael eich cyflogi gan yr awdurdod lleol, ond caniateir i athrawon fod yn banelwyr
  • paneli apêl derbyniadau penodol os ydych yn aelod o gorff llywodraethu'r ysgol sy’n rhan o’r apêl, ond nid yw hyn yn golygu eich bod wedi'ch gwahardd rhag bod ar baneli apêl mewn perthynas â derbyniadau i ysgolion eraill
  • paneli apêl derbyniadau penodol os oeddech yn rhan o benderfyniad i beidio â derbyn y plentyn sy’n apelio neu os ydych wedi bod yn rhan o unrhyw drafodaethau ynglŷn â sut y gwnaed y penderfyniad

Panel apêl gwaharddiadau – gwybodaeth a chymhwysedd

Tasg y panel yw gwrando ar apeliadau rhieni yn erbyn gwahardd disgybl a phenderfynu arnynt.

Mae panel gwaharddiadau’n cynnwys tri neu bump ar y panel. Mae hyn yn cynnwys un ar y panel sy’n aelod lleyg, un sy’n gweithio ym maes addysg neu reoli addysg ar hyn o bryd ac un sydd yn neu wedi bod yn llywodraethwyr ysgol am 12 mis yn olynol o fewn y chwe blynedd ddiwethaf.

Ydych chi’n cael bod ar y panel apêl gwaharddiadau?

Efallai y bydd amgylchiadau pan nad ydych yn gymwys i fod ar banel apêl gwaharddiadau, os:

  • ydych yn aelod o'r awdurdod lleol neu gorff llywodraethu'r ysgol sydd dan sylw
  • ydych yn bennaeth neu’n athro yn yr ysgol dan sylw neu wedi bod mewn swydd debyg o fewn y 5 mlynedd ddiwethaf
  • yn cael eich cyflogi gan yr awdurdod lleol (ac eithrio fel pennaeth neu athro neu athrawes)
  • oes gennych chi unrhyw gysylltiad â'r awdurdod addysg lleol neu unrhyw berson sy’n cael eu crybwyll yn y pwyntiau uchod, neu wedi cael cysylltiad ar unrhyw adeg, neu os oes gennych unrhyw gysylltiad â'r disgybl dan sylw neu â'r digwyddiad a arweiniodd at y gwaharddiad

Sut allaf i wneud cais?

Mae ceisiadau ar gau ar hyn o bryd.