Beth mae Panel Lleoliadau Gofal Plant yr Enfys yn ei wneud?

Mae Panel Lleoliadau Gofal Plant yr Enfys yn ystyried ceisiadau am gyllid byrdymor i gyfrannu tuag at gostau Gweithiwr Cefnogi Ychwanegol ar gyfer lleoliadau gofal plant a lleoliadau seibiant er mwyn:

  • gwella lles a gwytnwch teuluoedd plant sydd ag anableddau a/neu anghenion ychwanegol
  • cefnogi rhieni plant sydd ag anableddau a/neu anghenion ychwanegol i weithio 

Mae’r panel yn cwrdd bob mis ac mae’n rhaid cyflwyno ceisiadau am gyllid erbyn diwrnod gwaith cyntaf y mis y cynhelir cyfarfod y panel. Mae’r cyllid am gyfnod dros dro bob amser a chaiff ei ddyrannu os yw’r gyllideb yn caniatáu.

Mae’r panel hefyd yn ystyried ceisiadau am gefnogaeth Anghenion Dysgu Ychwanegol i blant sy’n derbyn Cynnig Gofal Plant Cymru ac sydd ag anabledd a/neu angen ychwanegol.

Meini prawf a chanllawiau lleoliadau gofal plant

Diffiniad ‘Anabledd neu Angen Ychwanegol’ yw: anabledd, angen iechyd cymhleth neu angen ychwanegol sy’n debygol o bara mwy na 12 mis ac sy’n cael effaith sylweddol ar fywyd bob dydd (gellir ei ystyried heb ddiagnosis).

Y disgwyl yw y bydd plant gydag anghenion ychwanegol eisoes yn cael eu cefnogi gan nifer o sefydliadau gwahanol a ddylai gael eu rhestru ar y ffurflen gais. Bydd cais yn cael ei wneud am ddatganiadau cefnogol gan y sefydliadau hyn cyn i’r panel gyfarfod.

Ni fydd ceisiadau ond yn cael eu derbyn gan unigolion proffesiynol sy’n gweithio gyda’r teulu (e.e. darparwr gofal plant, gweithiwr gofal iechyd). 

Beth yw’r meini prawf ar gyfer cyllid?

Bydd ceisiadau i Banel Lleoliadau Gofal Plant yr Enfys yn cael eu hystyried ar gyfer: 

  1. Cefnogi rhieni i weithio / astudio drwy ddarparu Gweithiwr Cefnogi Ychwanegol i gefnogi’r lleoliad gofal plant ar gyfer plentyn gydag anabledd neu angen ychwanegol.
  2. Cefnogi plentyn i fanteisio ar y Cynnig Gofal Plant: darparu Gweithiwr Cefnogi Ychwanegol a / neu adnoddau eraill i blentyn gydag anabledd neu angen ychwanegol.
  3. Helpu i wella lles plentyn / aelodau teulu mewn teuluoedd bregus; costau lleoliad seibiant / neu leoliad gofal plant a / neu Weithiwr Cefnogi Ychwanegol i gefnogi’r lleoliad gofal plant.

Ni allwn gymeradwyo'r cyllid ar gyfer Gweithiwr Cefnogi Ychwanegol lle mae’r plentyn eisoes yn cael cyllid tebyg neu wasanaethau tebyg gan asiantaeth arall. Ni allwn gymeradwyo cyllid ar gyfer lleoliadau gofal plant lle mae’r teulu’n cael ffynonellau eraill o gyllid gofal plant ar gyfer yr un diben. 
 

Faint o gyllid sy’n cael ei gynnig?

Fe allai’r cyllid ar gyfer gofal plant a gaiff ei gynnig drwy'r panel hwn gyfrannu (os oes angen):

  • £12 yr awr tuag at gostau cyflogi aelod ychwanegol o staff a fydd yn weithiwr cynhwysiant ar gyfer plentyn neu blant penodol (Gweithiwr Cefnogi Ychwanegol)

Faint o oriau yr wythnos all y cyllid fynd tuag atynt?

Mae uchafswm yr oriau yr wythnos y gall y cyllid ddarparu tuag at gost cyflogi aelod ychwanegol o staff wedi ei rannu fel hyn...

Cyllid Dwylo Ychwanegol – Cynnig Gofal Plant

Yn ystod y tymor  

Plant tair blwydd oed (Addysg Gynnar) - uchafswm o 20 awr yr wythnos

Tair i bedair oed (Meithrin y Cyfnod Sylfaen) – uchafswm o 17.5 awr yr wythnos

Gwyliau ysgol

Uchafswm o 30 awr (plant tair a phedair oed) yr wythnos
Bydd y cyllid yn cael ei fonitro yn ystod cyfnod y cynnig gofal plant, yn unol â’r Adolygiadau sy’n Canolbwyntio ar yr Unigolyn sy’n berthnasol i’r plentyn.

Cyllid ar gyfer Gweithiwr Cefnogi Ychwanegol – i alluogi rhieni i weithio

I blant sydd ddim mewn addysg llawn amser mae cyllid ar gael am uchafswm o 16 awr yr wythnos am uchafswm o 13 wythnos neu 1 tymor ysgol. Os yw’r teulu’n derbyn y Cynnig Gofal Plant, ni fyddant yn gymwys am oriau ychwanegol.

I blant sydd mewn addysg llawn amser mae cyllid ar gael am uchafswm o 10 awr yr wythnos am uchafswm o 13 wythnos neu 1 tymor ysgol.

Ar gyfer gwyliau ysgol, mae uchafswm o 16 awr yr wythnos am uchafswm o 9 wythnos o wyliau ysgol ar gael i bob plentyn. Os yw’r teulu’n derbyn y Cynnig Gofal Plant, ni fyddant yn gymwys am oriau gwyliau nac wythnosau ychwanegol.

Bydd yr oriau sy’n cael eu dyfarnu yn seiliedig ar batrymau gwaith rhieni / gwarcheidwaid.

Cyllid ar gyfer Gweithiwr Cefnogi Ychwanegol – i hyrwyddo lles a gwytnwch teuluoedd

Uchafswm o ddau hanner diwrnod neu sesiynau byrion yr wythnos (uchafswm o 6 awr y sesiwn) fel arfer am 3 mis.

A all y cyllid gael ei dynnu'n ôl?

Os yw’r plentyn yn colli tair sesiwn o ofal plant wedi’i ariannu, y lleoliad sy’n gyfrifol am roi gwybod am hyn i weinyddwr y panel ac fe all y cyllid a gynigir gael ei atal ar ôl y trydydd sesiwn a gollir. Bydd angen gwneud cais newydd am unrhyw gyllid yn y dyfodol. Bydd Staff Gwasanaeth Gwybodaeth i Deuluoedd Wrecsam yn cynnal gwiriadau ar hap.

Cyflogi Gweithiwr Cefnogi Ychwanegol

Os caiff y cyllid Gweithiwr Cefnogi Ychwanegol ei gymeradwyo, caiff yr aelod staff ei gyflogi gan y lleoliad gofal plant ei hun a bydd yn atebol i’r lleoliad hwnnw hefyd. Y lleoliad sy’n gyfrifol am dalu costau cyflogaeth ychwanegol sydd heb eu cynnwys yn y cynllun hwn. Y lleoliad sy’n gyfrifol am sicrhau bod y gweithiwr wedi cymhwyso'n addas ac wedi ei wirio drwy broses recriwtio ddiogel a phriodol. Bydd angen i’r lleoliad hefyd sicrhau bod y gweithiwr yn gweithio o fewn cwmpas eu polisïau, gweithdrefnau ac unrhyw ofynion cyfreithiol ychwanegol. Cyflogir y Gweithiwr Cefnogi Ychwanegol i gefnogi’r plentyn a nodir ar y ffurflen gais yn unig, oni bai bod y Panel yn mynegi fel arall.

Apeliadau

Gallwch apelio yn erbyn penderfyniad y panel os nad ydych yn cytuno â’r canlyniad.

Gallwch ofyn am ffurflenni apelio drwy anfon neges at paneladmin@wrexham.gov.uk. Pan fydd y ffurflen wedi ei chwblhau, dychwelwch hi mewn e-bost at paneladmin@wrexham.gov.uk.

Rhaid i unrhyw apêl ddangos yn glir y rheswm dros wrthod penderfyniad y panel. Bydd rhaid cynnwys gwybodaeth ychwanegol neu dystiolaeth nad yw wedi ei chynnwys yn y ffurflen gais wreiddiol i gefnogi eich cais er mwyn i’r apêl gael ei hystyried.

Rhaid i apeliadau gael eu derbyn erbyn y dydd Iau cyn cyfarfod y panel. Bydd unrhyw rai a gaiff eu derbyn ar ôl hynny yn cael eu hystyried yng nghyfarfod dilynol y panel.

Os ydych chi’n anghytuno â phenderfyniad yr apêl, gallwch gyflwyno cwyn drwy weithdrefn gwyno gyffredinol y cyngor. 

Proses ymgeisio lleoliadau gofal plant